Arbeid på Juvasshytta sesongen 2025

Me har omlag 30 ansatte i løpet av sumaren

Ynskjer du å arbeide hjå oss 2025 sesongen kan du nå søke.

Juvasshytta har lange tradisjonar og ei rik historie, heilt sidan Stor-Knud Vole bygde hytta i 1884. I dag vert ho driven av syskenparet Per Arne og Silje Vole, saman med sine foreldre Anne og Per. Me legg stor vekt på gjestane si oppleving og ynskjer å servere god, ekte mat basert på lokale råvarer.

Opplev fjellheimen medan du lagar mat med hjartet!

No ser me etter ein engasjert kokk som vil vera med oss i kommande sesong!

Kva me tilbyr:

• Moglegheit til å skape ditt eige kjøken med fokus på lokale råvarer
• Ein arbeidsplass med magisk utsikt til dei høgaste toppane i Jotunheimen
• Trivelege gjestar med topptur som mål og eit ungt, ivrig arbeidslag
• Tilgang til fantastiske naturopplevingar rett utanfor døra
• Fri kost og losji
• Løn etter avtale
• Moglegheiter for heilårs kontrakt – om den rette dukkar opp

Om stillinga:

• Oppstart 16. mai 2024
• Sesongen varer til 15. september 2024
• Varierte arbeidsdagar med mykje aktivitet
• Høve til å jobbe med eksklusive råvarer som rein, elg og hjort

Kven er du?

• Ein kreativ og engasjert kokk med lidenskap for gode råvarer og ekte mat
• Du trivst med å jobbe i team og tek ansvar for ditt kjøken
• Du elskar naturen og set pris på eit unikt arbeidsmiljø

I ei ledig stund kan du nyte det blikkstille Juvvatnet medan du ser fjell møte fjell i horisonten. Du får oppleve rypekull nær husveggen om hausten og sjå sola gå ned over Hestbreapiggane. Meir enn noko anna vil du vere med å gje slitne, glade og svoltne gjestar ein uforgløymeleg matoppleving.

Me ser fram til å høyre frå deg!

- Kjøkenassistent over 18 år

Som kjøkkenassistent må du gjerne ha erfaring frå tidlegare arbeid på kjøken. Du er kokkens "høgre" hand og assisterar kokken med det arbeidet som trengs.

- Frukostvert/vertinne, frå 16 år

Her startar du tidleg på morgon og har ansvar for at gjestane våre får ein god start på dagen. Du er med å set fram frukost, fyller på fat undervegs, held orden i matsalen og ryddar inn etter endt frukost.

- Reinhald, frå 15 år

Som reinhaldar må du rekne med å vera med på romvask og vask av felles areal på huset.

- Servitør frå 16 år

Som servitør er du med på middagsservering på kveldstid.

- Resepsjonist (fylt 20 år)

Her kan det vera høgt arbeidstempo, du må væra lett å samarbeide med da me ofte er fleire på jobb samtidig, vera serviceinnstilt og imøtekommande. Generelt glad i folk :)

Me har eiga hus for dei ansette der 2 og 2 deler soverom, og felles bad og opphaldsrom med alle på huset.

Jobb måndag til sundag med ein fridag i veka, samt fri kvar 3.sundag. Ferie utover dette etter avtale. Fri kost og losji (skattepliktig), 3 faste måltider per dag som er tidsbestemt. Mat ut over dette må du sjølv ha i personalboligen, der er det felles kjøleskap. vannkoker, TV, micro finns også i felles arealet.

Me anset fleire i sommarferien slik at du kan søke på spesifikke datoar. Det er dog størst sjanse for å få arbeid om du søkjer over ei lengre periode.

Sesongen for 2025 ser slik ut

8.-11.mai - toppturhelg

Sesongopning 8. mai - ope kvar dag fram til 14.september med daglege turar til Galdhøpiggen

Hyttevertinne/vert på toppen av Galdhøpiggen

Hytta på toppen av Galdhøpiggen er bemanna i høgsesongen, frå medio juni til medio august. Det er Juvasshytta som eig og driftar hytta.

Som hyttevert bur du på hytta opptil 5 døgn av gongen. Dette er ein unik moglegheit til å oppleve fjellet på nært hald og bidra til at gjestane får ei fantastisk oppleving på Noregs høgaste fjell.

Arbeidsoppgåver:

• Ta imot og ynskje gjestane velkomne
• Servering og enkelt matstell og sal av kioskvarer
• Halde orden på varer og reinhald i hytta
• Praktiske oppgåver knytt til drift av hytta

Kven er du?

• Du er serviceinnstilt og likar å jobbe med menneske
• Du trivst med å arbeide i fjellet og taklar vekesopphald på hytta
• Du er ansvarsfull, fleksibel og har godt humør
• Du bør like finesolnedgangar, rusta til å vere åleine men og like folk

Om du kan arbeide berre i sommarferien er det fint om du kan koma opp nokre helgar om våren og arbeide og gjere deg kjent med Juvasshytta og området rundt oss.

Send oss søknad på silje@juvasshytta.no, merk med "søknad jobb 2025", skriv litt om deg sjølv, legg ved attest, CV og periode som er aktuell for deg å jobbe.

Me ser fram til å høyre frå deg!

Me ansett omgåande om du er rett person for oss :)